top of page
  • 作家相片CC

獨自旅行篇

雖然好多人都會覺得成班人一齊去旅行感覺會開心啲,但有時我都想去個短短地嘅solo trip,自己行程隨意自己話事。不過,作為紅班狼瘡症患者,自己一個人去旅行一定要比其他人準備得更充足。




首先,我岀發前執藥時預多起碼3日嘅藥物份量,然後我會將藥物分開兩份裝住。例如,去5日嘅短程旅行時我會準備夠8日嘅藥,然後用兩個藥盒,A藥盒裝住3日藥,B藥盒又裝住5日藥。A藥盒會hand carry拎住上機,而B藥盒會拎去寄倉。咁樣嘅話,就算行李寄失咗,我都仲有3日藥食。除咗平日食嘅藥,保平安嘅腸胃藥、感冒藥等等我每次都會帶;但我相信大部分就算無紅班狼瘡嘅人都會帶,所以在此亦不多說了。


第二,我會將我嘅病歷、敏感藥物資料及服食中嘅藥物資料寫落一張卡,放入身分證膠套入面,隨身攜帶。Touch-wood有咩事,呢張卡嘅資料可以方便醫療人員應對同處理。


第三,唔會亂食嘢,尤其係生冷食物同街邊檔呢類相對高危嘅食物。去親日本大家都會狂食魚生刺身壽司;為免食完屙餐懵,我多數都會揀唔食,要食就食啲熟嘅材料,例如鰻魚、玉子燒等等。即使係食鍋物,都要煮熟啲先放入口。除咗生冷食物,通常街邊小食都好吸引,但為免岀事,我通常都係可免則免。


第四,我plan行程時唔會將日程編得太緊密。一嚟,我一向覺得去旅行係要探索四週唔係追景點;我最怕同一啲覺得要去曬所有景點check個in,影好多張相先叫完滿嘅人一齊去旅行。二嚟,計住幾點要由去A點岀發去B點會令人覺得有壓力(較啱時間搭火車之類嘅交通工具另計),趕頭趕命咁;輕輕鬆鬆慢慢行,既舒適又自在。自己去好就好在行程自己話事,唔洗理人。幾點起身都得,去邊都得,行行吓喺facebook IG見到另一個地方有得意嘢睇即刻搭車去睇都得。

4 次查看

最新文章

查看全部

Comentários


bottom of page