top of page
  • 作家相片匿名

富貴病

Hello,我今年廿二歲。 媽媽係SLE患者已經接近三十年,中間經歷過大起大跌,病發加藥物敏感,同死神擦身而過。 而我亦都大概三年前出現經常頭痛,間中手軟腳軟無力,腰酸骨痛,發燒。因為當時我唔係同媽咪同住,我冇乜概念。直到我一星期裡面第二次發燒嘅時候佢知道後叫左我去睇醫生。 初時啲普通科醫生都唔知我咩事,就咁開左啲止燒止頭痛比我。大概一個星期後,我開始勁甩頭髮,一束束咁甩,由又長又厚嘅頭髮甩剩三份一左右,誇張到我以為自己有癌症。



我媽知道我狀況之後要求我翻去同住,佢每日掃地拖地都會喊,佢望住周圍都係我啲頭髮好心痛。 佢同左佢SLE嘅主診醫生講我嘅情況,醫生亦都安排我睇佢,開左一隻叫「金龜勒?」(我唔知正確寫法)暫時控制身體嘅狀況。 當時嘅我真係好無助,從來冇諗過會發生係自己身上,亦冇諗過我一把又長又厚嘅頭髮竟然可以一下子冇晒,當時嘅我只不過係一個就黎廿歲嘅O靚妹。我仲好記得第一次抽血抽左十四筒血,同埋自此以後我就知道我再離不開等睇醫生等攞藥嘅日子。 由果刻開始,我停工兩個月左右,出街下下要戴帽。後期返工,要戴假髮,成個蓋係頭頂,其實真係唔想見人,好想收埋自己。


到依家,SLE嘅指數唔係高,但我就注定同陽光海灘冇緣,去到邊都要擔住把遮,得閒頭痛周身骨痛,頭髮就反反復復甩完又生生完又甩。 我媽細個成日同我講,呢個係富貴病。 哈,我依家終於明白,唔辛苦得唔曬得唔日夜顛倒得,最好留係屋企乜都得。

最新文章

查看全部

Comments


bottom of page